Rafmagn „Sker af þér skallann, þurrka og herði. Sel síðan aftur á uppsprengdu verði.“ Þetta er tilvitnun í texta við lag þeirra bræðra Halla og Ladda.
Ríkisstjórnin ætlar að opna fyrir brask með rafmagn. Stórkaupendur mun fá heimild til að kaupa meira rafmagn en þeir þurfa og fá um leið til að selja öðrum umfram rafmagnið.
Þórarinn Ingi Pétursson, formaður atvinnuveganefndar Alþingis og þingmaður Framsóknarflokksins, segir í Mogganum:
„Ég held að hingað til hafi það ekki verið raunin að slíkt væri ákjósanlegt fyrir álframleiðendur. Álverðið er alla vega það hátt eins og staðan er í dag en heimildin væri fyrir hendi með þessari breytingu. Hvort menn nýti hana er allt annað mál. Fyrr í vetur var þetta nokkuð til umræðu í tengslum við umræðuna um forgangsorku, hvort stórnotendur gætu selt aftur inn á kerfið, en þá vantaði einfaldlega lög til þess. Víða erlendis er þessi leið farin og því var ákveðið að setja þetta inn í frumvarpið.“
Þarna blasir skammsýnin við. Þar sem álverð er það hátt sem stendur þá áætlar þingmaðurinn að ekki verði braskað með rafmagnið, rétt sem stendur. Íhugar ekki hvað verður þegar álverð verður ekki eins hátt og nú.