Þórdís Kolbrún Reykfjörð Gylfadóttur segðu af þér ráðherraembættinu. Haltu áfram á þingi og sem varaformaður Sjálfstæðisflokksins. Þar er stutt til kosninga og nýttu þann tíma til að styrkja stöðu þína. Þú verður að komast fram fyrir Harald Benediktsson á framboðslista flokksins þíns. Farðu að vinna að því.
Varaformanni flokksins er ekki samboðið að vera fimmti þingmaður síns kjördæmis. Að auki er Haraldur ekki svo stór og sterkur að þú getir sæst á að vera í skugga hans. Jafnvel í hættu með að ná ekki þingsæti.
Sem sagt, segðu af þér ráðherradómi. Samhliða því skaltu birta staðfestingar á að þú hafir ekki þegið velgjörning þegar þú djammaðir með vinkonum þínum. Gerðu þannig hreint fyrir þínum dyrum, hvað það varðar. Siðan skaltu staðfesta við okkur öll að þú hafir ekki verið með ráðherrabílstjórann í vinnu þennan dag.
Þegar þetta er allt klappað og klárt skaltu berjast fyrir stöðu þinni innan þingflokksins og hjá kjósendum. Þetta er vonlaust eins og það er. Þú veist að þú ert meðal öflugri þingmanna þíns flokks.
Ég hef meira en þrjátíu ár reynslu af skrifum um íslensk stjórnmál. Tel mig vita hvað ég er að segja. Legg til að þú hið minnsta hugsir um þessi ráð. Gangi þér annars vel.
e.s. Svo er það hitt. Þú er ekki ómissandi. Hafðu engar áhyggjur af því. Þjóðin kemst af þó þú hættir sem ráðherra. Þú veist, eins vel og ég, að ríkisstjórnin mun halda áfram að loknum kosningum. Einhver núverandi minnihlutaflokkanna kemur til liðs við ykkur. Og þú verður aftur ráðherra.
-sme
