Þó sök Ármanns Kr. Ólafssonar sé mest er það samt svo að allir bæjarfulltrúarnir í Kópavogi hafa gerst sekir um leynd um magnaðar eigin launahækkanir. Kjósendur verða að sýna hug sinn í verki í kosningunum. Svona má ekki líðast.
Það var Geir Þorsteinsson, frambjóðandi Miðflokksins, sem birti upplýsingar um launahækkanirnar. Hafi hann þökk fyrir og þeir skömm sem reyndu að gera Geir tortryggilegan. Sjálfstæðisflokkur, Björt framtíð, Samfylkingin, Framsókn og VG eiga skömmina saman.
Einn þeirra sem samþykkti allt heila klabbið og þar á meðal hækkun eigi launa, Birkir Jón Jónsson Framsóknarflokki, segir í Fréttablaðinu í dag: „Það liggur í augum uppi að kjör bæjarstjóra Kópavogs hafa keyrt fram úr öllu hófi og að á nýju kjörtímabili verði þessi laun tekin til endurskoðunar með lækkun.“
Þvílíkt blabla. Birkir Jón veit að hann, rétt einsog aðrir meðlimir elítunnar, gerði allt sem hann getur og kann til að gæta þess að íbúar Kópavogs fengju ekki að frétta af því sem bæjarfulltrúar viðhöfðu sjálfum sér til hagsbóta.
Sjálfsætðisflokkurinn er í vanda. Það eru átta daga til kosninga og daglega koma fram fréttir þar sem oddvitar flokksins gerast frekir til peninga bæjarbúa sjálfum sér til framdráttar.
Fyrst var það í Hafnarfirði, svo í Kópavogi og nú er spurt; hvar næst?
