Sigurjón Magnús Egilsson skrifar:
Ungt fólk er afhuga Sjálfstæðisflokki. Skoðanakannanir sýna að rétt um sjö prósent yngstu kjósenda segjast myndu kjósa flokkinn. Sem er sáralítið. Ungar konur eru í fremstu röð í flokknum. Þeirra kynslóð hefur ekki áhuga og á sama tíma gera eldri flokksfélagar lítið úr ungu konunum.
Því er óvíst hversu margir leggja við hlustir þegar þær tala, eða lesa þegar þær skrifa. Áslaug Arna Sigurbjörnsdóttir vakti athygli fyrir skörulega framgöngu gagnvart málþófi Miðflokksins. Var bara töff við þá. Sýndi að hún hefur bein í nefinu.
Í Mogga dagsins skrifar hún grein, óð til atvinnulífsins, en sökum stöðunnar er óvíst hversu margir lesa. Unga fólkið hefur ekki áhuga og þeir gömlu hrista sennilega bara höfuðið.
Áslaug Arna er trú þeirri sannfæringu sinni að hún vill veikja eftirlitsstofnanir. Hér er sýnishorn úr grein Áslaugar Örnu, sem er þungamiðja greinar hennar.
„Ríkisvaldið er ekki grunnurinn að góðu og heilbrigðu samfélagi. Það sem skilar árangri, bættu samfélagi og aukinni hagsæld er atvinnulífið. Við styrkjum það með því að minnka skattbyrði, einfalda regluverk, hvetja fleiri í iðn- og verknám og fjárfesta í nýsköpun og tækniþróun, svo nokkuð sé nefnt. Þannig verður til samfélag þar sem allir hafa tækifæri, þar sem aðgengi að heilbrigðisþjónustu er framúrskarandi, menntakerfið fjölbreytt og sveigjanlegt, samgöngur góðar og löggæsla öflug.“
