„Ráðherrann gat ekki með nokkru móti svarað því hvað honum fyndist um málið eða málaflokkinn yfir höfuð. Ráðherranefnd um útlendingamál (sem hann á ekki sæti í) ætti nefnilega eftir að ræða það.
SPÁ: Nýja Framsókn mun fylgja hvaða stefnu sem verður ofan á og segja svo að þetta hafi alltaf verið augljóst og einmitt stefna flokksins, þetta er hluti greinar sem Sigmundur Davíð Gunnlaugsson, formaður Miðflokksins og áður formaður Framsóknar og forsætisráðherra, skrifar og birt er á Vísi.
Þetta var einnig rætt á Alþingi. Hér kemur Helga Vala Helgadóttir Samfylkingu:
„Hæstvirtur ráðherra svaraði að honum fyndist hvorki rétt né tímabært að vera að fjalla um þetta, sem er þó til umræðu í fjölmiðlum og þinginu á hverjum einasta degi, á meðan einhver ráðherranefnd, sem hann á ekki sæti í, væri að fara að fjalla um málið kannski einhvern tímann seinna. Virðulegur forseti. Þetta er ein leið þingheims til að fá ráðherra til að lýsa skoðun sinni á heitum málum sem eru í umræðunni og ég held að við hljótum að geta gert þá kröfu til ráðherra að þeir lýsi sinni skoðun hér í pontu en bíði ekki niðurstöðu einhverrar ráðherranefndar sem mögulega kannski einhvern tímann seinna mun fjalla um einhver mál.“
Hér er svo Sigmar Guðmundsson Viðreisn:
„Ég spurði svo formann Framsóknarflokksins um afstöðu hans til málsins í gær og fékk ákaflega framsóknarlegt svar sem var efnislega svohljóðandi: Ég svara því seinna. Þá skal ég segja þér fyrir hvað ég stend og hvað ég vil verja. Formanni Framsóknar er hins vegar ákveðin vorkunn. Hann er eins og örmagna foreldri sem þarf sífellt að þola rifrildi og ósamkomulag barnanna sem sitja á vinstri og hægri hönd við matarborðið. Slíkt tekur eðlilega á taugarnar til lengri tíma. Þetta gerist í hverju málinu á fætur öðru. Þetta er að gerast í orkumálum, þetta er að gerast í landnýtingarmálum, í auðlindamálum, í skattamálum og núna í útlendingamálum. Og þetta er ekki tæmandi upptalning.“
