Ný lota Vigdísar og meirihlutans

Átökin í stjórnkerfi Reykjavíkur er veruleg og ekki sér fyrir endann á þeim. Meirihlutafólkið í borgarráði verst ásökunum af öllum mætti.

„Það er miður að kjörnir fulltrúar hafi séð ástæðu til að rjúfa trúnað um samtöl sem hafa átt sér stað í borgarráði og fara með viðkvæmt starfsmannamál í fjölmiðla í þeim tilgangi að slá pólitískar keilur. Það liggur fyrir að borgin hefur ákveðið að áfrýja ekki dómnum og fullnægt því sem fram kemur í niðurstöðu dómsins. Vert er að taka fram að dómurinn kveður ekki á um að einelti hafi farið fram á skrifstofu borgarstjóra og borgarritara, heldur kveður hann á um að áminningarnar hafi átt að fella úr gildi. Því er mikilvægt að rétta þá rangfærslu sem hefur verið haldið fram á samfélagsmiðlum undanfarið að dómurinn hafi staðfest að einelti hafi átt sér stað,“ bókaði meirihlutafólkið.

Vigdís teflir fjöltefli, ein á móti mörgum og bókaði:

„Enn og aftur er ég sökuð um trúnaðarbrest þrátt fyrir að hafa farið yfir það í löngu máli á fundi borgarráðs í dag að svo væri ekki og sýndi fram á hvaðan upplýsingarnar komu. Í því sambandi voru tvö tölvuskeyti lesin upp frá framkvæmdastjóra Félags viðskiptafræðinga og hagfræðinga. Ég hafna þeirri lygi sem borin hefur verið á borð landsmanna undanfarna daga um þessi mál. Allar þær upplýsingar sem ég hef birt hef ég upp úr þeim bréfum sem hér er vísað í að ofan. Hinsvegar virðist skrifstofustjóri á skrifstofu borgarstjóra og borgarritara hafa haft trúnaðarupplýsingar af fundum borgarráðs undir höndum þegar hún skrifaði erindi til forsætisnefndar sem „óvart“ birtist í fjölmiðlum fyrir misgáning. Farið er fram á að upplýst verði hvar skrifstofustjórinn fékk trúnaðarupplýsingar úr borgarráði. Ég fer fram á að þeir embættismenn sem hafa ranglega ásakað mig um trúnaðarbrest biðji mig opinberlega afsökunar.“