Nota flugmenn í peningaflótta
- flugfélög eiga starfsmannaleigur í skattaskjólum. Koma hagnaði þangað og komast hjá skattgreiðslum. Hagkvæmt fyrir flugfélög, afleitt fyrir flugmenn.
Heimsþekkt flugfélög, t.d. Ryanair og Norwegian, eiga starfsmannaleigur, á aflandseyjum eða í skattaskjólum, sem eru notaðar til að útvega móðurfélögunum flugmenn og þá á uppstrengdu verði, langt umfram raunverulegan kostnað. Hagnaðurinn verður því mestur hjá starfsmannaleigunum í skattaskjólunum. Þannig komast flugfélögin undan umtalsverðum skattgreiðslum.
„Áhafnaleigur eru jafnvel í beinni eða óbeinni eigu flugfélaganna sjálfra og þá gjarnan staðsettar á aflandseyjum eða í skattaskjólum. Þær leigja þá flugfélögunum flugmenn á verði langt umfram þann kostnað sem þær hafa af flugmönnunum og hagnaðurinn verður þá eftir þar sem skattalegt hagræði er mest,“ skrifar Örnólfur Jónsson, flugstjóri og formaður Félags íslenskra atvinnuflugmanna í nýjasta fréttabréf félagsins.
Örnólfur nefnir dæmi um fléttur: „Flugrekstrarleyfi í einu landi, starfsstöð í öðru landi, áhafnaleigan í þriðja landinu með starfsfólki jafnan frá fjórða landinu. Þekkt flugfélög sem hafa gengið hvað lengst í þessum efnum eru Ryanair og Norwegian.“
„Til að koma í veg fyrir ótakmarkaða skattskyldu í landinu er fólk flutt milli starfstöðva reglubundið (e. floating base).,“ skrifar formaðurinn.
„Að flugmenn komi til starfa hjá flugfélögum í gegnum áhafnaleigur verður sífellt algengara. Starfsmannaleigur eru skilgreindar sem þjónustufyrirtæki sem samkvæmt samningi leigir út starfsmenn sína gegn gjaldi til að sinna störfum á vinnustað notendafyrirtækis undir verkstjórn þess síðarnefnda og falla áhafnaleigur þar undir. Fyrir flugfélög er þetta hagkvæm ráðstöfun en fyrir flugmenn afleit. Það sem útaf ber hjá flugmönnunum við slíkt ráðningarfyrirkomulag samanborið við flugmenn á kjarasamingi í gengum stéttarfélag er yfirleitt skortur á lífeyris-, orlofs-, veikinda og tryggingaréttindum. Einnig er uppsagnarfrestur jafnan stuttur eða hreinlega enginn. Þar fyrir utan skortir þá allt bakland í samskiptum við flugrekstaraðilann þegar upp koma ágreiningsmál. Tegundir slíkra samninga eru margskonar og kjör flugmanna mismunandi eftir áhafnaleigum.“
-sme
