Stjórnmál Sigurður Hr. Sigurðsson skrifaði þessa grein:
„Niðurlæging VG er fullkomnuð eftir fréttir síðustu daga og fátt annað í stöðunni en að gerast aðildarfélag í Sjálfstæðisflokknum. Fyrrverandi formaður flokksins og forsætisráðherra varð þess beinlínis valdandi að óvinsælasti og spilltasti ráðherra síðustu ára er orðinn nýr forsætisráðherra. Nú hefur KJ svo fengið þekktan áróðursmeistara og borgarfulltrúa Sjálfstæðisflokksins til liðs við sig þegar útlit er fyrir að kjósendur muni ekki velja hana sem næsta forseta. (Hvernig datt henni annars í hug að bjóða sig fram?!?)
VG hefur forgöngu um framlagningu frumvarps sem ekki einungis afhendir óábyrgum fiskeldisfyrirtækjum firði landsins til afnota um aldur og ævi, heldur fær frumvarpið algjöra falleinkunn hjá framkvæmdastjóra Landverndar (áður framkvæmdastjóra VG). Hún fullyrðir að frumvarpið megi ekki verða að lögum þar sem náttúruverndar- og dýravelferðarsjónarmið séu ekki höfð í heiðri, sjá athugasemd. Nýr formaður VG sem eitt sinn var framkvæmdastjóri Landverndar virðist einna helst fara huldu höfði og skal engan undra.
Það er nákvæmlega enginn trúverðugleiki eftir í Vinstri hreyfingunni „grænu“ framboði og frekar augljóst að henni verður annað hvort pakkað saman þegar flestir eru flúnir frá borði eða þá að fyrrum stuðningsmenn muni veita þeim ærlega ráðningu með því að kjósa allt annað frekar en þau. Framferði þeirra er ósiðlegt, óheiðarlegt og ósmekklegt.“
Friðjón R. Friðjónsson var lengi vel pólitískur aðstoðarmaður Bjarna Benediktsson.
