Nei takk, nenni ekki í aðra hringekjuferð

Hvað á að gera við bankabókina? Taka út og kaupa nýjan bíl áður en gengisfellingin verður meiri og allt hækkar í verði? Eða á að borga inn á fasteignalánin áður en verðbólgan skellur á af þunga?

Sá friður sem var, er úti. Því miður.

Ég nenni ekki meiru. Því miður henti ég bréfi sem ég fékk um daginn, þar sem mér var sýnt, að af sparnaðinum frá því fyrir hrun, á ég nú nokkra þúsundkalla eftir. Brotabrot af því sem ég sparaði. Þá trúði ég þeim sem mestan hag höfðu af því rugli öllu saman. Fólkinu sem hefur svo flutt sparnaðinn minn og annarra, fyrst úr landi, og síðan jafnvel heim aftur á tilboði, tilboði sem við hin borgum.

Ríkasta fólk landsins hefur kallað eftir gengisfellingu. Og það fær hana líklega. Við hin, þetta venjulega fólk, vitum ekki okkar rjúkandi ráð.

Vitum ekkert hvað verður. Vísast verður samt svo, að við sitjum eftir verr stödd en við erum nú. Til þess er leikurinn væntanlega gerður. Peningar verða fluttir til. Frá okkur til þeirra. Íslandi er stjórnað af ríkisstjórn fjárfesta. Þjóðin valdi.

Sérfræðingar tala í allar áttir. Vont er vita hverjum á að trúa. Best er að trúa þeim síst, sem sannanlega hagnast mest, af aðgerðum ríkisstjórnarinnar.

Hugsanlega er langt, langt þangað til IKEA, og aðrir, lækkar aftur vörur í verði til okkar. Það eru óvissutímar. Svo mikið er víst.

http://stundin.is/frett/gengi-kronunnar-fellur-hratt-eftir-bodun-afnams-hafta/

Sigurjón M. Egilsson.