Neytendur „Utanlandsferðir Íslendinga eru óðum að ná fyrri hæðum. Ef þróun síðustu missera helst óbreytt mun fjöldi brottfara Íslendinga frá Leifsstöð ná nýju hámarki í júlí á næsta ári. Þessar tölur telja bæði skemmtiferðir Íslendinga sem og brottfarir þeirra í öðrum tilgangi s.s. vinnutengdar ferðir. Þessa aukningu brottfara má rekja til bættra lífskjara og styrkingar krónunnar á síðustu árum samhliða uppgangs í atvinnulífinu,“ segir í Hagsjá Landsbankans.
Utanlandsferðir náðu hámarki í mars 2008
„Ef uppsafnaðar brottfarir Íslendinga á 12 mánaða tímabili eru taldar náðu þær hámarki í mars 2008 en þá höfðu 478 þúsund Íslendingar farið frá landinu síðustu 12 mánuðum þar á undan. Það er til jafns á við að hver Íslendingur hafi farið 1,5 sinnum til útlanda á þessu tímabili en mesti fjöldinn í einstaka mánuði var í júní 2007 þegar brottfarir Íslendinga námu 54,8 þús. í þeim mánuði einum. Uppfrá þessu hámarki í mars 2008 fækkaði ferðunum ört og þær náðu lágmarki um einu og hálfu ári síðan í október 2009 en þá höfðu 251 þúsund Íslendingar farið út 12 mánuðina þar á undan. Utanlandsferðir drógust því saman um tæplega helming frá því þær náðu hámarki í mars 2008 fram til lágmarksins einu og hálfu ári síðar. Ástæður fyrir þessum mikla samdrætti má finna í mikilli veikingu krónunnar sem dró verulega úr kaupmætti Íslendinga erlendis. Ofan á það bættust síðan nafnlaunalækkanir, aukin verðbólga og hærri skuldsetning sem dró mjög úr svigrúmi íslenskra heimila til utanlandsferða. Einnig dró mjög úr vinnutengdum utanlandsferðum hjá atvinnulífinu.“
Sjá nánar hér.
