Þetta var skömmu eftir að íslenskir Nasistar, félagar Ólafs, voru gerðir að heiðursfélögum í Sjálfstæðisflokknum.
Krisitnn Hrafnsson.
Kristinn Hrafnsson skrifar:
Stjórnmál Er í Berlín og hugsa til heimsókna minna til Sachsenhausen í jaðri borgarinnar en það var lokað búsetuúrræði sem Nasistum hugkvæmdist. Þar átti Leifur Muller heimili árum saman og losnaði við mörg aukakílóin. Vistin var ýmsum býsna strembin og gekk af sumum dauðum. Leifur var vistaður í þessu lokaða búsetuúrræði þar sem upp komst í Noregi að hann hygðist gerast flóttamaður og leita skjóls á Íslandi undan hertöku Þjóðverja. Líklegt þykir að Nasistinn Ólafur Pétursson hafi gert félögum sínum viðvart um þetta vanþakklæti Leifs.
Þetta var skömmu eftir að íslenskir Nasistar, félagar Ólafs, voru gerðir að heiðursfélögum í Sjálfstæðisflokknum og sú skoðun nokkuð útbreidd meðal þeirra að öll gagnrýni á kanslarann með yfirskeggið væri stækur kommúnismi. Þeim þótti hann hafa sýnt afrek í uppbyggingu innviða m.a. með fjármagni sem tekið var frá vanþakklátum þjóðfélagshópum.
Ekkert Júróvision var á þessum tíma en talsvert um alþjóðlega íþróttaviðburði, meðal annars ólympíuleikarnir í Berlín 1936 þar sem glatt var á hjalla og fátt sem spillti gleðinni þó að sumum þætti heldur verra að Jesse Owens, fótfrár blökkumaður, næði að koma sér þar á verðlaunapall með gull um hálsinn. Þetta sama sumar var lokaða búsetuúrræðið í Sachsenhausen vígt eftir að hafa verið reist af þeim mönnum sem síðar nutu kosta úrræðisins.
Þetta var fyrsta slíka úrræðið af mörgum sem opnuð voru næstu árin. Litlar líkur eru á að frumkvöðlarnir hafi náð að bregða sér á ólympíuleikana enda uppteknir við að koma sér þaki yfir höfuðið.
