„Ein aðferðin gæti verið að loka Keflavíkurflugvelli yfir nóttina eins og algengt er hjá flugvöllum í Evrópu en hafa opið t.d. á Egilstöðum og Akureyri.“
Þórir Garðarsson, varaformaður Samtaka ferðaþjónustunnar, tekur undir það sem sagt var í leiðara dagsins, hér á Miðjunni, það er að loka Keflavíkurflugvelli um nætur. Sjá hér.
Þórir skrifar: „Vandamálið við samráðs- og þekkingaleysi stjórnvalda er þegar menn sem ekki þekkja eðli ferðaþjónustunnar taka ákvarðanir sem geta verið hættulegar, skaðað áfangastaðinn og markmiðin snúast upp í andhverfu sína.
Síðan eru fengnir aðilar til að tjá sig og gefa sig út fyrir að vera sérfræðingar í álagstýringu ferðamanna eins og Gylfi Zoëga hagfræðiprófessor í fréttum Rúv í gær sem fullyrðir betra sé að nota virðisaukaskatt til að hægja á uppsveiflunni í ferðaþjónustu, því aðrar aðferðir bitni á öðrum.
Þetta er auðvitað fjarstæðukennt, það eru margar aðferðir til sem gætu dregið úr fjölgun á ákveðnum tímum án þess að bitna á öðrum og með miklu minni áhættu. Um leið gæti það skapað hvata til að ferðamenn dreifi sér betur um landið.
Ein aðferðin gæti verið að loka Keflavíkurflugvelli yfir nóttina eins og algengt er hjá flugvöllum í Evrópu en hafa opið t.d. á Egilstöðum og Akureyri.
Önnur aðferð gæti verið að setja á álagsgjald í flugstöðinni í Keflavík yfir háannatíma að sumri þegar ferðamenn eru flestir í landinu en ekkert gjald t.d. á Akureyri eða Egilsstöðum.“
-sme
