Myndlistarsýningin Fígúrur og form opnar í dag kl 17 á 1. hæð Borgarbókasafns Reykjavíkur, Grófarhúsi, Tryggvagötu 15. Myndlistarmennirnir eru Auður Inga Ingvarsdóttir og Hafdís Brand.
Sýningin er samstarfsverkefni þeirra Auðar Ingu og Hafdísar sem sýna listaverk unnin í leir. Þau eru flest veggverk en einnig nokkrir standandi skúlptúrar. Listaverkin sem bæði eru fígúratíf og formræn eru unnin með ýmsum aðferðum og óhefðbundnar brennsluaðferðir notaðar til að ná fram áferð og lit. Verkin eru öll unnin á síðustu mánuðum.
Skotland og leirlist tengja listakonurnar saman en báðar lærðu þær myndlist, með áherslu á leirlist í Glasgow School of Art í Skotlandi. Þær hafa starfað ötullega að myndlistarsköpun frá námslokum, Auður Inga hér á Íslandi og Hafdís á Íslandi og í Skotlandi. Leirlistin hefur átt hug þeirra beggja og vinnur Hafdís nær eingöngu með það efni og þá gerir hún einkum skúlptúra og veggmyndir. Auður Inga vinnur bæði nytjahluti og skúlptúra í leir auk þess sem hún málar. Auður Inga rekur, ásamt öðrum, Kaolin keramik gallerí við Skólavörðustíg í Reykjavík.
Listaverkin eru partur af Artóteki en Artótekið leigir út og selur íslenska myndlist til einstaklinga og fyrirtækja. Hægt er að skoða verkin á staðnum eða á vefsíðunni www.artotek.is.
Opið er mánudaga – fimmtudaga kl. 10-19, föstudaga kl. 11-18 og um helgar kl. 13-17. Sýningunni lýkur 7. desember.
