Neytendasamtökin mótmæla lækkun framlags ríkissjóðs til Samkeppniseftirlitsins en ráðgert er að það fari úr 396,6 milljónum í 385,6 milljónir. Segja samtökin að öflugt samkeppniseftirlit sé ein mikilvægasta stoð heilbrigðs markaðar og því sérlega mikilvægt hérlendis þar sem fákeppni sé vandamál.
Á síðu samtakanna kemur fram að stjórn Neytendasamtakanna hafi samþykkt ályktun þar sem lækkuninni er mótmælt. Kemur fram að þing Neytendasamtakanna hafi talið mikilvægt að samkeppni á neytendamörkuðum yrði efld og að eðlilegt væri að samkeppnisyfirvöld myndu gera sérstakt átak í greiningu og eftirliti með mörkuðum eins og matvöru-, fjármála- og eldsneytismörkuðum. Það sé mat Neytendasamtakanna að nauðsynlegt sé að efla Samkeppniseftirlitið í stað þess að veikja það.