Mannlíf Metaðsókn er í bólusetningu gegn inflúensu þrátt fyrir að flensan hafi ekki greinst hér á landi.
„Mikil ásókn hefur verið í bólusetningu gegn árlegri inflúensu á undanförnum vikum. Nú bregður svo við að allt bóluefni gegn henni er uppurið í landinu en frá því í haust hafa 60.000 skammtar verið seldir,“ segir á heimasíðu landlæknis.
Á liðnum árum hafa fimmtíu til fimmtíu og fimm þúsund skammtar verið seldir á hverjum vetri, nema veturinn 2013 til 2014 en þá seldust rúmlega sextíu þúsund skammtar.
„Um fimm þúsund skammtar verða nú keyptir aukalega af inflúensubólefninu en á þessari stundu er ekki vitað hvenær það verður tilbúið til afhendingar. Það verður auglýst um leið og það er vitað.
Ennþá hefur inflúensan ekki greinst hér á landi á þessum vetri en fregnir af einstaka tilfellum hafa borist frá nálægum löndum. Virkni bóluefna við að koma í veg fyrir veikindi af völdum inflúensuveirunnar er breytileg milli ára, en á þessari stundu er ekki vitað hver virknin verður í ár.“
