Mynd: Háskóli Íslands.
Mogginn slær hvergi af. Áfram er haldið að klifa á að allur almenningur hafi ofurlaun. Og að því verði að breyta eða þá að skera niður opinbera þjónustu eða þá að hækka skatta. Mogginn kallar Ragnar Árnason hagfræðing til verka. Ragnar segir:
„Launastigið er enda orðið of hátt til að landið geti verið samkeppnishæft á erlendum vettvangi. Við það bætast auknar ríkisskuldir. Þótt við komumst upp úr holunni, sem kórónukreppan skilur eftir sig á árinu 2022, sem er mjög líklegt, verður það einungis til þess að við náum aftur jöfnuði miðað við fyrra ástand. Þ.e.a.s. áður en komið er að því að greiða vexti af þessum nýju lánum.“
„Þess vegna eru yfirgnæfandi líkur á því að við verðum annaðhvort að skera niður opinber útgjöld eða hækka skatta. Það þarf að eiga sér stað mjög mikill hagvöxtur, umfram það sem þarf til að komast upp úr holunni, til þess að við getum forðast þessa tvo kosti. Sá hagvöxtur er ekki fyrirsjáanlegur,“ segir Ragnar í Mogga dagsins.
Svo þetta: Hann telur aðspurður að myndun vinstri stjórnar næsta haust kunni að festa þessi háu ríkisútgjöld og þar með hærri skatta í sessi.
„Reynslan bendir til þess. Vinstristjórnin 2009-2013… hækkaði skatta og ríkisútgjöld mjög mikið, og þótt Sjálfstæðisflokkurinn hafi stjórnað fjármálaráðuneytinu nær allar götur síðan hafa þessar skattahækkanir og aukning á ríkisútgjöldum ekki gengið til baka. Því er hætt við að hið nýja þrep, sem við erum að stíga upp á, gæti orðið varanlegt, sérstaklega ef vinstristjórn verður mynduð eftir kosningar.“
Þarna er farið á gamlar slóðir og sótt að formanni Sjálfstæðisflokksins og fjármálaráðherranum, Bjarna Benediktssyni. Bjarni hét því, þegar hann kæmist til valda, að afleggja á einu augabragði alla þá skatta sem ríkisstjórn Jóhönnu og Steingríms setti á árunum 2009 til 2013. Það er önnur saga.
