Alþingi Katrín Jakobsdóttir, formaður VG, spurði Sigmund Davíð Gunnlaugsson á Alþingi í gær, hvort skilja megi fjármálaráðherra á þann veg að ríkisstjórnin hyggist fækka skattþrepum. „…kemur mér á óvart að ríkisstjórn Íslands lýsi yfir í ljósi allra þeirra gagna sem liggja fyrir að ætlunin sé að fækka þrepum í skattkerfinu, ætlunin sé að fara aftur til baka í flatt skattkerfi. Ríkisstjórnin er auðvitað þegar búin að leggja sitt af mörkum í því með því að afnema auðlegðarskatt. Ég vil spyrja hæstv. forsætisráðherra, formann Framsóknarflokksins, sem stundum hefur verið þekktur fyrir að reyna að standa vörð um velferðina í samstarfi sínu við Sjálfstæðisflokkinn, hvort það geti verið stefna ríkisstjórnarinnar að fara þvert gegn ráðum allra alþjóðastofnana um að hverfa frá hinu þrepaskipta skattkerfi, aðgerð sem mun leiða til aukins ójafnaðar og samkvæmt þeim rannsóknum og gögnum sem liggja fyrir hafa slævandi áhrif á vöxt og velsæld. Það kemur líka fram hjá OECD að í samfélagi þar sem jöfnuður er mestur er líka vöxturinn og velsældin mest,“ sagði Katrín í ræðu sinni.
„…það virðist vera einhver misskilningur á ferðinni hvað það varðar,“ sagði forsætisráðherra. Hann sagðist ekki geta greint nákvæmlega frá hvað ríkisstjórn telji koma til greina til að liðka fyrir gerð kjarasamninga. „Án þess að ég ætli að fara nákvæmlega út í hvað menn hafa verið að skoða þar, því að það hlýtur að velta líka á því hvernig málin þróast hjá aðilum vinnumarkaðarins, hafa þær hugmyndir allar miðað að því að ýta enn undir jöfnuð í samfélaginu sem, eins og ég gat um áðan, hefur verið að aukast. Jöfnuður hefur verið að aukast, það hefur dregið úr misskiptingu frá því að þessi ríkisstjórn tók við og þær skattkerfisbreytingar sem verið er að skoða yrðu til þess fallnar að auka enn jöfnuð á Íslandi og minnka tekjubilið enn frá því sem nú er orðið.“
Þegar Katrín svaraði forsætisráðherra byrjaði hún að á að taka fram að skildi ekki svar ráðherrans. „…ég veit þó að hann byrjaði á að segja að þetta væri allt saman misskilningur.“ Katrín sagði einnig: „Fækkun þrepa mun ekki auka jöfnuð í samfélaginu.“
„Þessi misskilningur virðist vera þrautseigur þótt ég hafi reynt að leiðrétta hann,“ var það fyrsta sem forsætisráðherra sagði í seinni ræðu sinni.
