Verð á lyfjum sem seld eru án lyfseðils í apótekum er mjög mismunandi milli apóteka. Mesti munur var 89%. Lyfsölukeðjur bjóða ekki betri verð en önnur apótek þrátt fyrir stærð. Tvö apótek neituðu þátttöku. Lyfjaver Suðurlandsbraut var oftast með lægsta verðið og Lyfja Ísafirði var oftast með það hæsta.
Verðlagseftirlit ASÍ kannaði verð á 68 algengum lyfjum sem seld eru án lyfseðils i apótekum víðsvegar á landinu mánudaginn 3. nóvember 2014. Farið var í 21 apótek en Árbæjarapótek og Apótek Ólafsvíkur neituðu þátttöku í könnuninni. Verðmunur á lausasölulyfjum var frá 18% upp í 89%, en oftast var fjórðungs til helmings verðmunur á hæsta og lægsta verði. Lægsta verðið var oftast að finna hjá Lyfjaveri Suðurlandsbraut eða í 24 tilvikum af 68 og Garðs Apóteki Sogavegi í 22 tilvikum. Hæsta verðið var oftast að finna hjá Lyfju Ísafirði eða í 19 tilvikum af 68 og hjá Lyfsalanum Álfheimum í 16 tilvikum.
Mestur verðmunur í könnuninni var á 15 stk. af Ovestin hormóni sem var dýrast á 2.443 kr. hjá Apóteki Vesturlands en ódýrast á 1.290 kr. hjá Siglufjarðar Apóteki sem er 1.153 kr. verðmunur eða 89%.
Athygli vekur að lyfsölukeðjur sem ætla mætti að í krafti stærðarhagkvæmni gætu boðið upp á hagstæðari verð en smærri aðilar á markaði eru ekki að gera það. Verðlagseftirlitið vill hvetja neytendur til að spyrja um samheitalyf, sem gætu verið á hagstæðara verði og athuga með afsláttakjör.
