Kristján Þór Júlíusson gengur af velli. Fyrr en hann kannski vildi. Kristján Þór hefur skilað drjúgu verki. Verið helsti varnarmaður flokksins í vörninni um óbreytt kvótakerfi. Hann hélt markinu hreinu. Baráttan kostar hann starfið.
Útgerðin gerir út Moggann. Helsti tilgangurinn er að verja kvótakerfið, stjórnarskrána, krónuna og sjá til þess að við göngum ekki í Evrópusambandið. Það var flott hjá Bjarna Benediktssyni þegar hann gerði Kristján Þór að sjávarútvegsráðherra. Hætti öllu pukri. Fór alla leið.
Kristján er samtvinnaður Samherja. Sú staðreynd vegur eflaust þyngst í að Kristján Þór leggur nú árar í bát. Getur ekki meir. Getur ekki annað. Bjarni hefur undið úr honum allt þrek og trúverðugleika. Því verður Kristján Þór að hætta.
Hvað tekur við hjá Kristjáni Þór er kannski óvíst. Hann hefur unnið sér inn inneign víða. Brátt kemur að skuldaskilum. Kristján Þór mun fá sitt. -sme
