Davíð Oddsson brúkar Viðskiptablaðið í heilögu stríði sínu gegn Ríkisútvarpinu. Hann teygir sig yfir til Viskiptablaðsins að þessu sinni.
„Örn Arnarson, fjölmiðlarýnir Viðskiptablaðsins, ræðir skapandi bókhald Ríkisútvarpsins í nýjasta pistli sínum. Þar segir hann að uppljóstranir um bókhaldsbrellur hjá ríkisstofnun hefðu einhvern tímann þótt fréttnæmar: „Ætla hefði mátt að hinn fjölmenni her rannsóknarblaðamanna á ríkismiðlinum hefði gert slíkum fréttum góð skil og ekki veigrað sér við að velta öllum steinum til að komast ofan í kjöl málsins.
Því er þó ekki fyrir að fara þegar kemur að stórfróðlegri 104 blaðsíðna skýrslu Fjölmiðlanefndar um starfsemi Ríkisútvarpsins sem birt var í síðustu viku,“ segir í Staksteinum.
Og áfram: „Ekki múkk um það í fréttum Ríkisútvarpsins, engin afhjúpun í Kveik, ekki hósti í Silfrinu. En hvað með alla okkar margverðlaunuðu rannsóknarblaðamenn á Stundinni? Gáfumennin á Kjarnanum sem nærast á opinberum skýrslum? Skúbbmeistara Miðjunnar sem engu eira þegar sannleikurinn er annars vegar? Nei, þeir hafa ekki hnotið um fréttina enn,“ hefur Davíð eftir Erni.
Miðjan hefur ekki sinnt þessari merku frétt. Miðjan hefur þá sérstöðu að þar starfar einn á ritstjórn, og það ekki í fullu starfi. Stundum gefst ekki tími til alls þess sem hugurinn stendur til. Hafi Miðjan unnið til sakar í þessu máli þá verður bara svo að vera. Víst er að það er ekki af áhugaleysi.
Höldum áfram með Davíð og Örn á Viðskiptablaðinu:
„Enginn fjölmiðill að Morgunblaðinu undanskildu hefur gert skýrslunni skil, en í henni kemur skýrt fram að ríkismiðillinn hafi þverbrotið þjónustusamning sinn við stjórnvöld með því að flokka verktakagreiðslur til starfsmanna sinna sem kaup á dagskrárefni frá sjálfstæðum og óskyldum framleiðendum.“
Davíð á lok greinarinnar, alveg skuldlaust:
„Hvað skýrir þessa æpandi þögn? Getur verið að fréttastofa Rúv. hafi ekki enn frétt af lögbroti eigin stofnunar eða tekur hún vísvitandi þátt í yfirhylmingunni?“