„Það eru fulltrúa Miðflokksins vonbrigði að sjá Heilbrigðiseftirlit Reykjavíkur leggjast gegn breytingum sem stuðla að auknu öryggi landsmanna.“
„Fulltrúi Miðflokksins fagnar þeirri breytingu sem boðuð er á reglugerð um notkun nagladekkja sem felur í sér lengingu leyfilegs tímabils á notkun þeirra,“ bókaði Baldur Borgþórsson Miðflokki á fundi umhverfis- og heilbrigðisráðs Reykjavíkur.
„Mikil notkun nagladekkja er ein helsta uppspretta lífsógnandi svifryksmengunar á höfuðborgarsvæðinu. Auk þess valda nagladekkin gríðarmiklum og mjög kostnaðarsömum skemmdum á yfirborði gatnanna,“ segir hins vegar í bókun meirihlutaflokkanna.
Baldur bókaði meira: „Sú breyting á eftir að tryggja betur öryggi vegfarenda víða um land og ekki vanþörf á í því veðurfari sem landsmenn búa við og er veturinn í vetur rækileg áminning þar um. Hér verður að taka tillit til þeirra sem á landsbyggðinni búa og þurfa meðal annars að sækja þjónustu til borgarinnar af ýmsum ástæðum. Þeirra öryggi þarf að tryggja. Það eru fulltrúa Miðflokksins vonbrigði að sjá Heilbrigðiseftirlit Reykjavíkur leggjast gegn breytingum sem stuðla að auknu öryggi landsmanna.“
„Mikil notkun nagladekkja er ein helsta uppspretta lífsógnandi svifryksmengunar á höfuðborgarsvæðinu. Auk þess valda nagladekkin gríðarmiklum og mjög kostnaðarsömum skemmdum á yfirborði gatnanna. Af þeim stafar líka talsverður hávaði, einkum þegar hratt er ekið. Það er tímaskekkja og mikil afturför að nú eigi að lengja nagladekkjatímabilið. Nær væri að stjórnvöld beittu sér fyrir því að draga eins og kostur er úr nagladekkjanotkun,“ bókaði meirihlutinn.
