Enn ber vel í veiði hjá okkur sem höfum gaman af innanflokksátökum í Sjálfstæðisflokki. Tveir fyrrverandi þingmenn flokksins opinbera skoðanir sínar á Davíð Oddssyni og einkum skrifum hans í Mogganum.
Ragnheiður Ríkharðsdóttir:
Er mér slétt sama hver skrifar Reykjavíkurbréf Morgunblaðsins svona almennt þó ýmsir telji sig þekkja stíl fyrrum formanns Sjálfstæðisflokksins. En ég fordæmi síðustu skrifin þar sem utanríkisráðherra, sem lagði fram tillögu til varnar mannréttindum, er sakaður um að slá skjaldborg um fíkniefnasala á Filippseyjum. . Hversu lágt er hægt að leggjast til að koma höggi á einstaklinga, spyr sú sem ekki veit.
Jón Magnússon:
Ég bíð alltaf spenntur eftir því að lesa Reykjavíkurbréfið og hef ekki orðið fyrir vonbrigðum. Minnir um margt á stílbrögð og ritsnilli hins svokallaða Austra þ.e. Magnúsar Kjartanssonar í Þjóðviljanum á sínum tíma og á þeim tíma voru Sjálfstæðismenn ekki svo þurrpumpulegir að þeir gætu ekki dáðst að stílbrögðunum og framsetningunni þó þeir væru mismunandi sammála og venjulega ósammála pistlahöfundinum.
