„Forsætisráðherra Ísraels svaraði og sagði að hann myndi samþykkja vopnahlé þegar Hamas-hermdarverkasveitin hefði skilað gíslunum sem þeir höfðu á brott með sér frá Ísrael. Það var ekki óbilgjörn krafa. En um sama leyti var blásið til fjöldafunda víða í hinum fáu lýðræðisríkjum veraldar, til þess að lýsa einhliða yfir stuðningi við þann sem stóð fyrir styrjöldinni, með upphafi sem mætti ætla að yrði lengi í minnum haft og ekki aðeins fordæmt til málamynda,“ segir Davíð í leiðara dagsins.
Davíð veit að fólk hópast ekki saman til stuðnings hryðjuverkamönnum í Hamas. Við vitum það öll. Þjóðarmorðið er hryllingur sem allt mannkyn ætti að mótmæla. Og alls ekki fagna. Búið er að murka lífið úr ótal börnum og fólki sem hvergi kom nærri hryllingsverki skæruliðanna í Ísrael fyrir mánuði.
Án friðar mun hryllingurinn halda áfram. Alþjóðasamfélagið verður að koma böndum á illvirkjana í Ísrael sem og í Hamas.
-sme