Margfalt fleiri deyja úr Covid í ráðherratíð Willums en dóu í tíð Svandísar

Gunnar Smári skrifar:

Samkvæmt Johns Hopkins háskólanum hafa 229 Íslendingar dáið af eða með cóvid. Áberandi er breytingin sem varð við endurnýjun ríkisstjórnarinnar fyrir rúmu ári. Breyting sést á því að á meðan Svandís Svavarsdóttir var heilbrigðisráðherra, frá fyrsta andlátinu vegna cóvid og þar til hún hætti, dó að meðaltali einn á rúmlega 18 daga fresti. Eftir að Willum Þór Þórsson tók við hafa liðið að meðaltali rúmir 2 dagar milli dauðsfalla tengdum cóvid.

Þetta held ég að sé afdrifaríkasta stefnubreyting íslenskra stjórnvalda sem minnst hefur verið rætt um. Upplýsingasíða landlæknis er t.d. ekki með upplýsingar lengur um hversu margir hafa dáið frá upphafi (maður þarf að leggja saman sjálfur). Þótt fjöldi dauðsfalla sé sendur út til Alþjóða heilbrigðisstofnunarinnar og Johns Hopkins og þessar stofnanir birta uppsöfnuð dauðsföll þá eru þær ekki birtar almenningi almennilega á Íslandi.

Kannski er almennt samkomulag í samfélaginu að ræða ekki lengur cóvid og allra síst þau sem deyja af völdum þessa sjúkdóms. Ég missti af þeim fundi. Þessi stefnubreyting og þögnin í kringum hana, það að enginn sé spurður eða beðinn að rökstyðja hana, er með því allra skrítnasta sem ég hef upplifað í þessu samfélagi okkar. Og er þó margt skrítið innan þess.

Gunnar Smári svaraði spurningu um þetta, svona:

„Það var samið um stefnubreytingu í þessum málum við endurnýjun ríkisstjórnar. Þess vegna fór Svandís úr ráðuneytinu og Willum tók við. Ég er ekki að halda því fram að Willum hafi gengið á milli og drepið þetta fólk. En hann tók að sér að framfylgja breyttri stefnu sem hafði þessar afleiðingar. Og í sjálfu sér hefur enginn rukkað hann um skýringar (ekki frekar en Bjarna á glórulausum halla á ríkissjóði). Kannski er fólk bara almennt og yfirleitt sátt með þetta allt.“