Losaðu þig við móðuna í bílnum

Í Verslunarskóla Íslands stunda hörkuduglegir strákar, þeir Birkir, Birgir Bragi, Grétar Þór, Helgi og Ástþór nám á viðskiptabraut á lokaári. Hluti af náminu er unnið í samvinnu við Junior Achievement (Ungir frumkvöðlar) og snýst um að stofna fyrirtæki og koma því á laggirnar.
(nánar um JA: Ungir frumköðlar á Íslandi, rétt eins og alþjóðasamtökin Junior Achievement sem þeir tilheyra, vinna að því að skapa aðstæður til að ungt fólk geti skapað þá framtíð sem þeir kjósa. Með fjölbreyttum námskeiðum er nær yfir allt skólakerfið, allt frá 6 ára aldri og til loka háskólanáms, er fræjum plantað og með natni og elju er hlúð að þeim til að þau geti að lokum orðið að öflugum sprotum).
Fyrirtæki þeirra, Móðey var formlega stofnað 6. febrúar 2017, þó undirbúningur hafi hafist fyrr.
Í aðdraganda stofnunar fyrirtækisins þurfti að ákveða hvernig vöru þeir ætluðu að framleiða og selja og ákváðu að framleiða algjöra nýung, poka fyllta silicakristöllum, til að nota í bíla. Efnið í þeim er mjög rakadrægt og fyrir vikið verður móða innan á rúðum ekki vandamál lengur. Enda er nafnið mjög lýsandi, Móðey.
Mikil vinna var svo lögð í viðskiptaáætlunina og er það í raun stærsti hluti verkefnisins.
Eftir ákvörðun hófst vinna við að hanna vöruna og prófa virkni. Hönnunin tók sinn tíma og eftir að hafa framleitt nokkrar frumgerðir komust þeir að endanlegri niðurstöðu um útlit. Þá hófst framleiðslan sjálf, en þeir framleiða allt sjálfir, sitja við að sauma og fylla á pokana.
Það þarf að stíga öll skrefin sem þarf að stíga við stofnun fyrirtæka og til að fjármagna stofnkostnað fyrir tækisins seldu þeir hlutabréf og tókst fjármögnun á stuttum tíma.
Þá skiptu þeir með sér hlutverkum:
Birkir Ingimundarson (markaðsstjóri)
Birgir Bragi Magnússon (framleiðslustjóri)
Grétar Þór Kristinsson (fjármálastjóri)
Helgi Júlíusson (framkvæmdastjóri)
Ástþór Arnórsson (mannauðsstjóri)

Eftir að Facebook síðan fór í loftið fór varan að seljast og umfram væntingar, svo fyrsta framleiðsla seldist upp. Von er á næstu sendingu fljótlega í sölu, en nú þegar er forsala úr þeirri sendingu hafin.  „Besta auglýsingin er að sjálfsögðu ánægja notendanna og hér eru ummæli:
„Svínvirkar, engin móða lengur“
„Pokinn frá Móðey kom sér vel í morgun. Engin móða inn á framrúðunni hjá mér“

Þegar samskiptamiðlar og auglýsingar fara almennilega af stað gerum við ráð fyrir að salan muni aukast og að fyrirtækið skili hagnaði.
Við lokun fyrirtækisins er stefnan að greiða út 10% arð til hluthafa. Einnig ætlar Móðey að láta 10% af tekjum sínum renna til Björgunarsveitarinnar Landsbjargar.
Hægt er að nálgast Móðey pokana hér á Facebook síðu fyrirtækisins og á vörumessu sem haldin verður í Smáralind 1. apríl n.k.