Áttunda ljóðaslamm Borgarbókasafns Reykjavíkur verður haldið á Safnanótt, föstudaginn 6. febrúar 2015. Að þessu sinni er þemað „sykur“. Ljóðaslammið er ætlað ungu fólki frá aldrinum 15-25 ára.
Ljóðaslammið er skilgreint á afar opinn hátt sem einskonar ljóðagjörningur og er áherslan ekki síður lögð á flutninginn en á ljóðið sjálft. Þannig telst hefðbundinn ljóðaupplestur ekki til ljóðaslamms.
Á vef Borgarbókasafns segir að dagskrár síðustu fjögurra ára hafi einkennst af hugmyndauðgi, krafti og frumleika en fyrri þemu voru ‚spenna’, ‚hrollur’, ‚væmni‘, ‚sjálfstæði‘, ‚myrkur‘, ‚af öllu hjarta‘ og ‚bilun‘. Eina krafan hefur verið sú að frumflutt væri óbirt frumsamið ljóð eða stuttur prósi á íslensku og hafa þátttakendur sýnt dansverk, ör-leikþætti, rapp, fólk hefur sungið og leiklesið ljóð með myndefni svo eitthvað sé nefnt.
Fimm manna dómnefnd velur þrjú bestu atriðin. Skráningarfrestur er til mánudagsins 23. janúar 2015 .
Upptökur af siguratriðunum þremur verða settar á ljodaslamm.is, sem er undirsíða borgarbokasafn.is og á YouTube.
Sjá nánar á vef Borgarbókasafns.
