„Það sem háttvirtur þingmaður ræðir hér er að mínu mati, og ég hef margítrekað sagt það, stærsta viðfangsefni íslenskrar efnahagsstjórnar og við verðum að ná tökum á verðbólgunni,“ sagði Lilja Alfreðsdóttir þegar hún svaraði Þórhildi Sunnu Ævarsdóttur.
„Það sem hefur verið að gerast er að verðbólgan hefur lækkað frá því að vera næstum því 10% í 7,7%. Einkaneysla er að minnka, það eru aðhaldssöm ríkisfjármál. Peningastefnunefnd Seðlabanka Íslands hefur margítrekað hækkað stýrivexti og nú er svo komið með mörg lán sem tekin voru fyrir sirka tveimur til fimm árum að það er endurskoðunarákvæði þar og vaxtabyrði getur hækkað verulega. Það verður stórt vandamál á næsta ári náum við ekki þessari verðbólgu niður og ég er sammála háttvirtum þingmanni að það er stærsta áskorunin.“
Lilja sagði svo:
„Það sem er hins vegar að gerast, og ég tel að háttvirtur þingmaður líti fram hjá, er að hagstjórnin þessa dagana gengur í takt og ég held að við munum sjá á næstunni lækkun á verðbólgu, m.a. vegna þess að krónan hefur verið að styrkjast. Þess vegna tel ég að það séu talsverðir möguleikar á því að við munum ekki sjá þessa gríðarlegu hækkun á vöxtum, að því gefnu að við náum verðbólgunni niður. Gerist það ekki þá þarf að ráðast í umfangsmiklar efnahagsaðgerðir til þess að aðstoða þau heimili sem lenda í þessu verðbólguskoti.