Lilja rekur sig á

Stjórnmál Lilja Dögg Alfreðsdóttir menntamálaráðherra hefur rekið sig illilega á. Hún vill eflaust lækka virðisaukaskatt á bækur. Ástæðulaust er að efast um það. Ekkert slíkt verður gert nema Bjarni Benediktsson heimili það. Bjarni ræður. Sennilega eru bækur ekki ofarlega í huga fjármálaráðherrans. Hann gerir stöðu Lilju menntamálaráðherra vandræðalega. Og hefur kannski gaman af.

Af veikum mætti segir Lilja í Mogganum að hún sé nokkuð viss um að skatturinn verði lækkaður á næsta ári. Og meira en það, hún segist þar viss um að sama verði um virðisaukaskatt á fj-lmiðlla og tónlist. Lilja ræður þess ekki. Það gerir hins vegar Bjarni.

Mogginn rifjar upp: „Af­nám bóka­skatts mun ekki taka gildi í upp­hafi fjár­laga­árs­ins 2018 þrátt fyr­ir að þing­menn allra flokka á Alþingi hafi lagt fram sam­eig­in­legt frum­varp þess efn­is þann 26. sept­em­ber síðastliðinn. Nú­ver­andi mennta­málaráðherra var fyrsti flutn­ings­maður frum­varps­ins.“

Þingmenn og þingflokkar ráða ekki Íslandi. Það gerir Bjarni Benediktsson.

„Þetta stend­ur í stjórn­arsátt­mál­an­um og það verður fyrsta skrefið sem við tök­um varðandi breyt­ing­ar á virðis­auka­skatt­in­um, að fella niður skatt­inn á bók­um,“ sagði Lilja í sam­tali við Morg­un­blaðið í gær, greinilega vonsvikin yfir afstöðu þess sem öllu ræður.

-sme