Í boði stjórnvalda erum við að greiða allt of hátt verð fyrir sérhagsmunagæsluna.
Inga Sæland skrifar:
Hvaða endemis rugl er það sem er borið á borð fyrir okkur nú í auga stormsins? Sóttvarnarteymið fær ekki leið á að segja okkur að landinu hafi jú aldrei verið lokað, til að réttlæta innflutning veirunnar. EN ÞAÐ ÁTTU ALLIR AÐ FARA Í TVEGGJA VIKNA SÓTTKVÍ ÞÁ, sem er miklu öflugri aðgerð en nú er við líði þar sem liðlega 50.000 einstaklingar hafa komið til landsins frá 15. júní án þess að vera skimaðir eða farið í sóttkví. Lífsgæði okkar eru hreinlega fótum troðin fyrir ferðaþjónustu sem var að stórum hluta tæknilega gjaldþrota um síðustu áramót, þ.e. fyrir Covid. Vegna græðgi og offjárfestinga í greininni var hún að niðurlotum komin þrátt fyrir tvær og hálfa milljón ferðamanna til landsins árlega.
Flokkur fólksins segir NEI TAKK, við hefðum viljað sjá Þjóðhátíð í Eyjum, við viljum sjá ALLA skóla á fullu ferðinni, alla okkar menningu og heilbrigðisþjónustu og bara ALLT. fá að virka og ganga áfram sinn vana gang í friði, sjá samfélag án samkomutakmarkana, tveggja metra reglu og ótta við hið óþekkta. Við í Flokki fólksins lítum upp til stjórnvalda á Nýja-Sjálandi sem fumlaust hafa tekið á vandanum og vitað hvað þau voru að gera. Þau uppskera samkvæmt því og njóta virðingar alls samfélagsins um leið. Að ætla að spila póker með líf okkar, mannréttindi og frelsi vegna sérhagsmuna sem valdhafarnir eru að verja er með öllu óásættanlegt svo ekki sé dýpra í árina tekið. það er löngu orðið tímabært að við fáum að vita hvað skattgreiðendur eru að borga með mislukkuðum aðgerðum stjónvalda með tilliti til „ábatans“ sam af þeim verður. Hvers virði er hvert mannslíf? það er lágmark að við fáum að vita ábatann af því að flytja veiruna svo grimmilega til landsins og segja okkur síðan að við verðum að kingja því og læra að lifa með henni. Hvað þýðir að læra að lifa með henni fyrir þá sem eru í svo kölluðum áhættuhópi? Jú það þýðir að loka sig inni og gleyma því að eiga fjölskyldu og vini nema í gegnum fjarbúnað í tölvu fyrir þá sem hafa tök á að nýta slíkt, en það eru sannarlega margir sem geta það ekki. Ég hef horft á eftir einstaklingum á besta aldri ofan í gröfina af allt öðrum völdum en Covid-19 þar sem þeim var einfaldlega vísað frá heilbrigðisþjónustu og sagt að fara heim og taka því rólega.
Í boði stjórnvalda erum við að greiða allt of hátt verð fyrir sérhagsmunagæsluna. Það er kominn tími til að setja okkur fólkið í landinu í fyrsta sæti og það STRAX ! Við viljum ekki læra að lifa með Covid-19 við viljum veirufrítt Ísland hvað sem það kostar, mannslífin eru ómetanleg til fjár.