Gunnar Smári skrifar: 2018: Dauði foringjastjórnmálanna. VG bauð ekki fram stefnu í haustkosningum 2017 heldur Katrínu Jakobsdóttur og náði öllu sínu fram; Katrín varð forsætisráðherra, en það breytti auðvitað engu.
Þrátt fyrir linnulaust tal um persónuval og tilgangsleysi flokka, hefur 2018 einmitt dregið fram tilgangsleysi persónustjórnmála og þörf fyrir flokka með raunverulega stefnu og virka grasrót sem gætir að stefnunni (en er ekki hollvinasamtök forystufólksins).
Samfylkingin keyrði linnulaust á Degi B. Eggertssyni í vor og uppskar aðeins það; Dag í stól borgarstjóra yfir meirihluta með stefnu Viðreisnar og botnlausa spillingu sem tilheyrir hópum sem hafa ekki hugmynd til hvers þeir koma saman.
Sigmundur Davíð, Íslandsmeistari í persónukjöri (fór inn á þing við sjötta mann vegna trúar fólks á persónur og blindu gagnvart stefnu) endaði árið sokkinn í fen eigin heimsku.
Bjarni Ben er krabbamein Sjálfstæðisflokksins, spilltasti stjórnmálamaður Íslandssögunnar, sem hangir í forystu vegna þess að Sjálfstæðisflokkurinn er í eðli sínu ekki hugmyndadeigla heldur stormsveitir formannsins, flokkurinn byggir á gagnrýnislausri hlýðni við formann sinn, sama hvaða hálfviti það er.
Flokkur fólksins helmingaðist vegna efasemda um hollustu þingmanna við formanninn.
Kjörnir fulltrúar Pírata halda að formaður og foringjaræði geti læknað flokkinn af átökum, sem rekja má til óljósrar stefnu (það er óljóst til hvers er fólk að koma saman í þessum flokki, grunnstefna Pírata er of grunn og nær ekki utan um átökin í samfélaginu).
Samfylkingin vex vegna þess að flokkurinn er með formann, sem vill ekki (eða getur ekki) krafist tignunar í krafti myndugleika.
Viðreisn telst ekki með, forysta þess flokks er hjá hagsmunasamtökum atvinnulífsins (utan útgerðar).
Framsókn er flokkur án foringja. Foringinn getur ekki einu sinni haldið samgönguráðuneytinu, Jón Gunnarsson hefur tekið það af honum. En Framsókn vex í könnunum. 2019 verður ár stefnu í stjórnmálum, framtíðarsýnar og þátttöku almennings í stjórnmálum. Það er eina lausnin gegn heimsku og spillingu stjórnmálanna.
