Mannlíf Landsleikurinn Allir lesa fer nú fram í annað sinn, að þessu sinni á þorra. Keppnin hefst á bóndadaginn, föstudaginn 22. janúar og lýkur á konudaginn, sunnudaginn 21. febrúar. Opnað var fyrir skráningu liða föstudaginn 15. janúar en allir geta tekið þátt með því að stofna eða ganga í lestrarlið og skrá lestur sinn á vefinn allirlesa.is. Liðin geta verið stór eða smá, þau geta verið vinnustaðalið, fjölskyldur, vinahópar, leshringir, skólafélagar o.s.frv. Foreldrar eða afar og ömmur sem lesa með börnum sínum geta til að mynda stofnað fjölskyldulið og skráist lesturinn þá bæði á þann sem lesið er fyrir og þann sem les.
Fyrsti leikurinn fór fram úr björtustu vonum aðstandenda en um 330 lið kepptu og voru lesnir klukkutímar vel yfir 70.000. Þegar lestur var skoðaður eftir búsetu kom í ljós að Vestmannaeyingar báru höfuð og herðar yfir önnur sveitafélög. Þá voru konur um 72% lesenda. Skáldsögur reyndust langvinsælasti bókaflokkurinn en barnabækur fylgdu fast á eftir. Gaman verður að sjá hvernig dreifingin verður í ár.
Landsleikurinn er tilvalin leið til að hrista fólk saman og skemmta sér við lestur um leið og lesið er til sigurs. Eins og áður skiptist liðakeppnin í þrjá flokka: vinnustaðaflokk, skólaflokk og opinn flokk. Þátttakendur mynda lið og skrá lestur á vefinn allirlesa.is. Þau lið sem verja samanlagt mestum tíma í lestur standa uppi sem sigurvegarar. Í lokin eru sigurlið heiðruð með viðurkenningum og verðlaunum. Hvert lið velur liðsstjóra sem skráir liðið og lestur þess eða fær hvern einstakling til að sjá um eigin lestrarskráningu. Í hverju liði verið allt frá 3 og upp í 50 keppendur með einum liðsstjóra sem hvetur fólk til dáða og aðstoðar það við skráningu. Allir geta tekið þátt enda er landsleikurinn Allir lesa bæði sáraeinfaldur og stórskemmtilegur!
Að Allir lesa – landsleik í lestri standa Miðstöð íslenskra bókmennta og Reykjavík Bókmenntaborg UNESCO með stuðning frá Mennta- og menningarmálaráðuneytinu og Reykjavíkurborg.
