Læknir ákærður fyrir áralangt ofbeldi gegn eiginkonu og börnum – Barði með banana og hótaði lífláti með lyfjagjöf

Lögreglustjórinn á Vestfjörðum hefur ákært læknismenntaðan karlmann fyrir áralangt ofbeldi hans gegn eiginkonu hans og þremur börnum. Honum er meðal annars gefið að sök að hafa barið konuna með banana og hótað henni lífláti með lyfjagjöf.

RÚV greinir frá og vísar í ákæruna þar sem fram komið að ofbeldið hafi staðið yfir áralangt og meðal annars gegn konunni þegar hún var barnshafandi. Læknirinn er þá sakaður um að hafa neitað konunni um aðstoð þegar hún var fótbrotin og nokkrum sinnum ógnað líf hennar, til að mynda með því að læsa hana inni þegar hún var lág í sykri en hún er sykursjúk.

Þá segir í ákærunni að maðurinn hafi þvingað konuna til húsverka og barið hana í andlitið með banana og þvingað hana til að borða maís af eldhúsgólfi á heimili þeirra.

Læknirinn er ennfremur ákærður fyrir að hafa beitt þrjú börn þeirra ofbeldi, ógnað lífi þeirra og velferð og misboðið þeim með ruddalegu og ósiðlegu athæfi.

Aðalmeðferð málsins verður við héraðsdóm Vestfjarða síðar í þessum mánuði.