Mogginn gerir sjónarmiðum Kristjáns Loftssonar góð skil i dag. Hann er vægast sagt afar ósáttur við athafnirnar í matvælaráðuneytinu og segir að þar séu lagðir steinar í götu hans.
„Það liggur alveg á borðinu. Ef það er ekki þá vita þeir ekkert
þarna í ráðuneytinu, þessi ráðherra og þetta starfsfólk í kringum hann hvernig hvalveiðarnar eru og hvaða tímabil þú ert að veiða. Við höfum nú verið í gangi síðan 1948 og ef þetta er ekki komið inn fyrir vegginn þarna í Lego-landsherbergið þarna þar sem þeir eru að leika sér að bátum og svona. Þú veist að þeir eru með tvö herbergi í matvælaráðuneytinu, annað fyrir landbúnaðinn og hitt fyrir sjávarútveginn, og þar eru þeir með allt fullt af legokubbum og bátum og svona og eru að leika hvalveiðar og fiskveiðar og svona til að sjá hvernig grásleppuveiðarnar ganga og allt það.“
Kristján segist hins vegar ekki af baki dottinn. Hann hyggist halda veiðum áfram og nýta sterkustu nytjastofnana á miðunum kringum landið.
„Ég veit ekki hvort þeir vilji mig feigan en aðalmálið er að þeir eru búnir að fletta upp í þjóðskrá og vita hvað ég er gamall og þeir eru alltaf að bíða eftir því að ég hrökkvi upp af.“
-sme
