Seðlabankinn á EKKI að kaupa skuldabréf fyrirtækja!
Ragnar Önundarson skrifar:
Jæja, þeir eru ekki seinir á sér að reyna að koma krumlunni í kökuboxið!
Það er grundvallarregla markaðsbúskapar að fé eigenda, oftast nefnt hlutafé eða eigið fé, sé áhættufé og tapist fyrst ef illa fer. Næst í röðinni eru ótryggðar skuldir við birgja og inneignir viðskiptavina (fyrirframgreiðslur). Þar næst koma veðskuldir. Ekki má umturna þessari röðun áhættunnar. Í bankakerfinu þurfa fyrirtæki að setja bönkum veð, því almenningur leggur inn hjá þeim án veða og í trausti þess að þetta sé gert. Viðskiptabankar og sparisjóðir (innlánsstofnanir) einir fá að vera í viðskiptum við seðlabankann, sem er bara deild í ríkissjóði, sem almenningur á. Af hverju? Almenningi er ekki ætlaður neinn hlutur í gróða umsvifamannanna og því ALLS EKKI eðlilegt að almenningur veiti fjárfestum, hluthöfum og umsvifamönnum styrki !
Seðlabanki á m.ö.o. EKKI að kaupa skuldabréf fyrirtækja! Lífeyrissjóðir almennings eiga ALDREI að taka þátt í ótryggðum ,,skuldabréfaútboðum” fyrirtækja, ekki einu sinni þó búnir séu til ,,vafningar” af slíkum pappírum í nafni áhættudreifingar !