Nú er hafin mikil samkeppni milli verslana um verð á ýmsum vöruflokkum. Meginástæðan er sú, að bandaríska heildsölu- og samvinnuverslunin Costco hefur opnað og býður verð á ýmsum vörutegundum, sem er oft er lægra en hér hefur áður sést. Nú hefur komið í ljós, að íslenskar verslanir, sem keppa við Costco, geta lækkað smásöluverð um verulegar fjárhæðir.
Ég velti því fyrir mér hvaða áhrif þessi samkeppni á eftir að hafa á vísitölu neysluverðs. Ég velti því líka fyrir mér hve háar fjárhæðir neytendur hafa greitt vegan hins háa vöruverðs, sem hér hefur ríkt um áratugaskeið, og hvaða áhrif það hefur haft á vísitöluna, sem aftur hefur haft áhrif á verðtryggingu lána. Skyldu íslenskir neytendur ekki hafa greitt nokkra miljarða sökum ónógrar samkeppni á neysluvörumarkaði og vegna hækkunar á verðtryggingu, sem af hefur leitt. Það er alltaf almenningur, sem pungar út, hvort sem það er til að bjarga bönkum eða vegna himinhás verðlags.
Árni Gunnarsson.
