Eigendur Moggans horfa fram á óþolandi umræðu. Þeir keyptu Moggann og jusu endalaust af peningum til að halda honum gangandi. Mogganum og Davíð var og er ætlað að verjast. Verjast nýrri stjórnarskrá, verjast breytingum á kvótakerfinu og að sótt verði um aðild að Evrópusambandinu.
Sverðið hefur snúist í höndum eigendanna. Til þess hefur tekist að verjast heilögum málum kvótafólksins. Nú hrynja varnirnar. Davíð er til lítils gagns. Er bitur og reiður eldri maður sem stórum hluta þjóðarinnar er nákvæmlega sama um. Hlustar ekki á hann. Veit jafnvel ekki hver hann er.
Mogginn er að fara sömu leið. Bitur og finnur ekki taktinn. Sem von er. Mogginn höfðar ekki til yngra fólks. Það eldra hefur fjarlægst Moggann hin síðari ár. Mogginn er vonlaus til baráttu. Úr honum er allur máttur.
Hlutskipti Davíðs verður aumt. Hans bíður að fylgja Mogganum til grafar. Verður útfararstjóri. Ekki nema hann flýji af hólmi.
