Þetta er efnahagsstefna sem hefur það eitt markmið að verja eignir hinna ríku.
Gunnar Smári skrifar:
Það segir allt um galna efnahagsstjórn ríkisstjórnarinnar að frá því á fimmtudaginn í þar síðustu viku, þ.e. í dymbilvikunni þegar þjóðin svaf, át súkkulaði og reifst um sóttvarnahótel, hækkuðu hlutabréf í kauphöllinni um meira en 50 milljarða króna. Kauphöllin blæs því út í miðri efnahagslegri niðursveiflu, heimsfaraldri og met atvinnuleysi. Það er ekkert að frétta af fjárfestingum einkafyrirtækja og opinber fjárfesting dregst saman. Það eina sem hreyfist er verðmiðinn á gömlum eignum. Engin ný störf hafa verið búin til tólf mánuðum eftir að kreppan skall á. Þetta er efnahagsstefna sem hefur það eitt markmið að verja eignir hinna ríku.
50 milljarðar króna jafngilda um 3% hækkun á virði hlutabréfanna á tæpum hálfum mánuði. Sem er auðvitað fullkomlega galið. Til að verja hagnað hinna ríku mun ríkisstjórnin setja á lög um skattaafslátt vegna hlutabréfakaupa. Það er gert þegar kauphöllin hefur bólgnað svo mjög að allir vita að blaðran mun springa. Til að ná út hagnaði sínum þurfa hin ríku að fá almenning til að kaupa hlutabréf og viðhalda bólunni meðan þau læðast út. Þegar þau hafa leyst út gróðann fellur bólan yfir almenning. Samhliða þessu mun Seðlabankinn halda uppi virði krónunnar meðan hin ríku flýja hagkerfið og flytja fé sitt útlanda. Þegar það er búið mun gengi krónunnar falla yfir almenning.
Blaðran mun springa.
Frá ársbyrjun 2020, áður en kórónafaraldurinn skall á, hefur virði hlutabréfanna í kauphöllinni hækkað um 483 milljarða króna. Lífeyrissjóðir eiga um 46% af kauphöllinni svo þeir bókfæra um 220 milljarða af þessari hækkun. Restin, um 260 milljarðar, eru gengishagnaður fjársterkra aðila. Af þeim má áætla að um 200 milljarðar króna tilheyri innlendum aðilum, mest 0,1% ríkasta fólkinu sem hefur auðgast enn meira í kórónafaraldrinum. Það fólk er nú að leita að útleið fyrir þetta fé. Það ætlar ekki að brenna inni þegar bólan springur. Og það á og rekur ríkisstjórnina til að tryggja hagsmuni sína.
