…báðar kannast ekkert við það að kjósendur séu að hafna þingmönnum flokksins…
Katrín Baldursdóttir skrifar:
Ég vil taka það fram að ég ber mikla virðingu fyrir Svandísi Svavarsdóttur heilbrigðisráðherra og Katrínu Jakobsdóttur forsætisráðherra. En í þessari ríkisstjórn hafa þær breyst í konur sem eru ekki í tengslum við raunveruleikann og ganga meira að segja svo langt að segja ósatt. Svandís sagðist í Kastljósi í gærkvöld vona að áfram verði jöfnuður hafður að leiðarljósi og að áfram verði það þannig að engin verið skilin út undan og átti við að þessar áherslur hafi verið ofan á í þessari ríkisstjórn. Svona stjórnmálamenn eru hættulegir. Sem ljúga bara blákalt upp í opið geðið á manni. Sem betur fer er miklu erfiðara fyrir stjórnmálamenn að ljúga í dag en það var áður. Fólk er miklu meðvitaðra um þetta og lætur ekki blekkjast af viðlíka bulli. Svandís þykist ekki hafa frétt af öllu atvinnuleysinu, fátæktinni sem því hefur fylgt, húsnæðisvandræðunum, fátæku öryrkjunum og eftirlaunafólkinu sem hefur verið skilið eftir á meðan að auðugt fólk malar gull í friði og ró og stórfyrirtæki eins og Samherji rakar saman peningum með vilja þessarar ríkisstjórnar. Er það jöfnuðurinn sem Svandís talaði um í Kastljósinu?
Og ekki var það trúverðugra hjá henni og ekki heldur hjá Katrínu Jakobsdóttur í kvöldfréttum Stöðvar 2 þar sem þær báðar kannast ekkert við það að kjósendur séu að hafna þingmönnum flokksins þó þeir hafi tapað í prófkjörum í flestum kjördæmum og séu komnir í sæti sem eru nánast vonlaus fyrir þingmennsku. Og hvort kjósendur Vg séu ekki þar með að lýsa yfir vanþóknun á störfum þessara þingmanna og á áherslum Vg í ríkisstjórninni. Nei, nei þær kannast ekkert við þetta og Svandís túlkaði þetta sem sigur því nú væru svo margir sem vildu vera með. Katrín vildi heldur ekkert kannast við neina ónægju hjá flokksmönnum. Þessar konur hafa valdið mér verulegum vonbrigðum. Kannski eru þær svona örvæntingarfullar og eru til í að gera allt til að halda í sætin. Meira segja að ljúga.