Katrín: „Baráttan gegn kynbundnu ofbeldi heldur áfram og í þeirri baráttu skipta ákvarðanir stjórnvalda máli”

Katrín Jakobsdóttir forsætisráðherra og formaður VG segir að „stundum er ágætt að líta yfir þann árangur sem náðst hefur í mikilvægum málum.

Baráttan gegn kynbundnu ofbeldi og áreitni heldur áfram og er hvergi nærri lokið og í þeirri baráttu skipta ákvarðanir stjórnvalda máli.

Hér eru nokkrar vörður sem munu skipta sköpum í framtíðinni þegar við tökumst á við kynbundið ofbeldi sem ég hef oft sagt vera eina mestu meinsemd sem finna má í okkar samfélagi,” segir Katrín og bætir við:

„Stór skref hafa verið stigin í að efla löggjöf, bæta stöðu brotaþola og koma af stað öflugu forvarnarstarfi. Ég get nefnt lagabreytingatillögur um bætta réttarstöðu brotaþola kynferðisofbeldis sem voru samþykktar nú í júní. Þá var hrundið af stað vitundarvakningu fyrr í vor gegn kynferðisofbeldi og í fyrsta hluta hennar er sjónum beint að skemmtanalífinu.”

Hún nefnir líka að „ýmis önnur frumvörp eru orðin að lögum og farin að skipta sköpum eins og frumvarp um kynferðislega friðhelgi sem tekur með afgerandi hætti á þeim mikla ógnvaldi sem stafrænt kynferðislegt ofbeldi er orðið í samtímanum.”

Katrín segir það ánægjulegt að segja frá því að framfylgd fyrstu heildstæðu áætlunarinnar um forvarnir meðal barna og ungmenna gegn kynferðislegu og kynbundnu ofbeldi og áreitni sem samþykkt var á Alþingi er í góðum farvegi. Bendir á að fylgjast má með framvindu hennar á sérstöku mælaborði sem finna má hér:

„Istanbúl-samningurinn var fullgildur 2018 en hann kveður á um forvarnir og baráttu gegn ofbeldi gegn konum og heimilisofbeldi. Mikilvægt frumvarp um umsáturseinelti er orðið að lögum sem gerir slíkt atferli refsivert og tryggir betur vernd þeirra sem fyrir því verða.”

Katrín nefnir að „margar þessar tillagna eiga rætur að rekja til vinnu stýrihóps sem ég skipaði árið 2018 undir forystu Höllu Gunnarsdóttur með fulltrúum ólíkra ráðuneyta; hópnum var falið að fjalla á heildstæðan hátt um umbætur í kerfunum okkar þegar kemur að kynferðislegu ofbeldi.”

Að hennar mati hefur þar „margt gott fólk komið að málum og minnir okkur á hvernig samvinna ólíkra einstaklinga og stofnana getur skilað raunverulegum umbótum fyrir venjulegt fólk; við sjáum varhugaverða þróun víða um heim þegar kemur að réttindum kvenna og því skiptir máli sem aldrei fyrr að standa vörð um þau réttindi sem hafa áunnist og slaka aldrei á í baráttunni í átt að jafnrétti.

Allt eru þetta mikilvæg mál sem skipta máli fyrir okkur öll sem samfélag,” sagði Katrín að lokum.