Yfir brunarústunum mun forysta flokksins og þingmenn vonandi sjá sóma sinn í því að segja sig úr flokknum…
Arnar Þór Jónsson.
Arnar Þór Jónsson, fyrsti varaþingmaður Sjálfstæðisflokksins í Kraganum, er líklegast kaskótrygging Jóns Gunnarssonar. Bjarni formaður lofaði Guðrúnu Hafsteinsdóttir að hún tæki við ráðherraembætti á þessum tíma. Jón Gunnarsson fékk að vita strax að hann væri ráðherra aðeins til bráðabirgða.
Arnar Þór Jónsson er í baráttu gegn stjórn flokksins, þá einkum formanninum, Bjarna Ben. Nú segir Arnar Þór að Sjálfstæðisflokkurinn sé ekki lengur réttnefni yfir flokkinn. Honum sé sama um sjálfstæði þjóðarinnar og eigi frekar að heita „Flokkurinn“. Jón Gunnarsson er jú þingmaður í þessu sama kjördæmi.
Ætli Bjarni að setja Jón af, hefur Jón tromp í erminni. Ef hann segist þá vilja hætta á þingi þá verður Arnar Þór Jónsson þar með fastaþingmaður. Ekki lengur varaþingmaður. Það yrði erfitt fyrir marga, ekki síst Bjarna.
„Með því að standa að framlagningu slíks frumvarps leggur Sjálfstæðisflokkurinn stefnu sína og hugsjónir á bálið. Yfir brunarústunum mun forysta flokksins og þingmenn vonandi sjá sóma sinn í því að segja sig úr flokknum eða leggja til að fyrri hluti nafns hans verði þurrkaður út svo að heitið verði aðeins „Flokkurinn“,“ skrifar Arnar Þór varaþingmaður Sjálfstæðisflokksins í kjördæmi Bjarna Ben.
