„Hvers vegna þorir hæstvirtur ráðherra ekki að taka rétta ákvörðun og stöðva hvalveiðar strax?“
Gunnhildur Fríða Hallgrímsdóttir.
„En það sem þessi umræða dregur hins vegar fram er hversu miklar breytingar hafa átt sér stað á samfélaginu. Við erum að setja umfjöllun og umræðu um dýravelferð miklu meira á dagskrá en við höfum áður gert. Við eigum að spyrja okkur sjálf þeirrar spurningar hvort við sem samfélag viljum heimila að kálffullar langreyðarkýr séu hundeltar klukkustundunum saman og margskonar með sprengjuskutlum þangað til að lokum dregur af þeim og þær gefast upp. Það er spurningin sem við sem samfélag stöndum frammi fyrir. Það er spurningin sem ég hef á mínu borði og við sem kjörnir fulltrúar getum ekki vikist undan þessari umræðu frekar en aðrir. Ég þakka háttvirtum þingmanni fyrir að setja þetta á dagskrá hér í óundirbúnum fyrirspurnatíma,“ sagði Svandís Svavarsdóttir á Alþingi í gær.
Gunnhildur Fríða Hallgrímsdóttir, sem er varaþingmaður úr hópi Pírata spurði Svandísi:
„Hvernig má þá vera að hæstvirtur ráðherra þori ekki að standa með eigin sannfæringu, þori ekki að standa með áliti þjóðarinnar, þori ekki að standa með eigin yfirlýstum áætlunum í loftslags- og vistkerfamálum og með reglugerðum landsins sem þessar hvalveiðar hafa margbrotið? Hvers vegna þorir hæstvirtur ráðherra ekki að taka rétta ákvörðun og stöðva hvalveiðar strax?“
„Það er hins vegar þannig, eins og háttvirtur þingmaður veit, að ráðherrar geta einungis framkvæmt það sem löggjafarvaldið hefur gefið þeim vald með lögum til að gera og samkvæmt ráðgjöf sem lögfræðingar matvælaráðuneytisins hafa gefið mér er ekki að finna skýra lagastoð fyrir stjórnsýsluviðurlögum, svo sem afturköllun leyfis að svo búnu,“ svaraði Svandís.
