Jarðýtur og beltagröfur í boði VG
„Gengu æðstu forystumenn samstarfsflokka Sjálfstæðisflokksins fast fram; formaður forystuflokksins, hæstvirtur forsætisráðherra, og varaformaður hins flokksins, hæstvirtur menntamálaráðherra, auk annars tignarfólks úr þessum flokkum.“
„Það kom ekki já við þessari spurningu, herra forseti.“
„Í fyrirspurnatíma spurði ég hæstvirtan forsætisráðherra hvort mætti treysta því að ríkisstjórn hennar verji óbyggð víðerni á hálendi Vestfjarða. Það kom ekki já við þessari spurningu, herra forseti. Samkvæmt þessu verður þarna sleppt lausum jarðýtum og beltagröfum í boði VG sem munu stórspilla vötnum og fossum og öðrum náttúruperlum samkvæmt áliti Umhverfisstofnunar. Þetta er gjaldið sem VG greiðir fyrir þátttöku í ríkisstjórninni.“
Þannig mæltist Ólafi Ísleifssyni, Flokki fólksins, við upphaf þingfundar í morgun.
Ólafur var ekki hættur: „Á hinn bóginn, herra forseti, máttu Sjálfstæðismenn sitja undir því að samstarfsflokkar þeirra virtu sjónarmið þeirra vettergis í máli um kosningaaldurinn sem þeim er bersýnilega umhugað um. Gengu æðstu forystumenn samstarfsflokka Sjálfstæðisflokksins fast fram; formaður forystuflokksins, hæstvirtur forsætisráðherra, og varaformaður hins flokksins, hæstvirtur menntamálaráðherra, auk annars tignarfólks úr þessum flokkum. Ýmsir hljóta að vera hugsi eftir þessa viðburði gærdagsins. Í hugann kemur herra forseti, hið fornkveðna: Alltaf má fá annað skip og annað föruneyti.“
