Jæja, Ari Trausti, Palli Magg og þið hin sem skipið meirihluta Þingvallanefndar, hvað nú? Ríkissjóður þarf að borga Ólínu Þorvarðardóttur tuttugu milljónir vegna ykkar fantaskapar og miskunnarlausrar framgöngu. Hvað gerið þið? Sitjið áfram eins og ekkert hafi í skorist? Eða hunskist þið burt?
Nei, þið farið hvergi. Sá er háttur ykkar stjórnmálamanna. Þið umfram allt annað. Þið teflið lífi annarra eftir fyrirskipunum að ofan. Úr stjórnarráðinu. Aum er staða ykkar. Sem kunnugt er sóttu tvö um stöðu þjóðgarðsvarðar á Þingvöllum. Ólína og Einar Sæmundsen.
Fótgönguliðar ríkisstjórnarinnar voru á einu á einu máli. Þeir höfnuðu fyrrverandi þingmanni Samfylkingarinnar. Mottóið virðist vera; einu sinni andstæðingur, ávallt andstæðingur.
Skuggalegust er framganga Páls Magnússonar. Hann mætti ekki einu sinni til kynningar á umsækjendunum. Bara mætti ekki.
Þingmenn stjórnarandstöðunnar voru á einu máli. Völdu Ólínu. Sem var rétt niðurstaða miðað við þá stöðu sem nú er uppi.
Stjórnarliðarnir Ari Trausti Guðmundsson Vinstri grænum, Vilhjálmur Árnason Sjálfstæðisflokki, Páll Magnússon Sjálfstæðisflokki, og Líneik Anna Sævarsdóttir Framsóknarflokki höfnuðu Ólínu ranglega. Staða þingmannanna breytist ekkert þrátt fyrir það.
Hanna Katrín Friðriksson Viðreisn, Karl Gauti Hjaltason , þá í Flokki fólksins nú Miðflokki og Oddný Harðardóttir Samfylkingu völdu Ólínu.
