„Íslensk stjórnvöld hafa staðið sig gríðarlega vel í þessari baráttu“
…hér hafa verið skilvirkar aðgerðir í gildi á landamærum…
Ástæða er til að endurbirta þessa frétt úr Alþingi. Hún var fyrst birt fyrir þremur dögum. Áður en nýjustu aðgerðir komust á dagskrá.
Katrín Jakobsdóttir sparar sig hvergi þegar hún talar um árangurinn í baráttunni gegn Covid:
„Það er auðvitað svo, herra forseti, að íslensk stjórnvöld hafa staðið sig gríðarlega vel í þessari baráttu og það er fyrst og fremst vegna þess frábæra fagfólks sem við eigum hér á landi sem hefur veitt okkur ráðleggingar og hins vegar vegna samstöðu þjóðarinnar í þeirri baráttu. Ég held að við eigum ekki að gera lítið úr því hvernig staðan hefur verið hér ef við berum okkur t.d. bara saman við aðrar þjóðir í Evrópu,“ sagði hún.
„Hér hefur mun vægari aðgerðum verið beitt, hér hafa verið skilvirkar aðgerðir í gildi á landamærum og hér hefur verið unnið út frá þeirri hugmyndafræði að við treystum fólki. Auðvitað er gremjulegt þegar fólk reynist ekki traustsins vert. Það þarf svo fáa til til að valda miklum skaða og það er dapurlegt. En ég er þeirrar skoðunar að við eigum ekki að missa traustið á fólki heldur alltaf að ganga fram af ákveðinni hófsemd í því sem við gerum. Það höfum við gert og því höldum við alltaf áfram með það skýra sjónarmið að við ætlum að vernda líf og heilsu landsmanna,“ sagði forsætisráðherra á Alþingi í dag.
