Ísland er opið allan sólarhringinn. Á Íslandi eru verslanir sem eru opnar allan sólarhringinn. Ef eigendur þeirra verslana vildu draga úr traffíkinni myndu þeir frekar hækka vörurnar um von að færri kæmu, eða myndu þeir loka búðunum hluta úr sólarhringnum?
Ísland er opið allan sólarhringinn. Leifsstöð lokar aldrei. Lækkar verðið á nóttinni og því fjölgar sífellt þeim flugfélögum sem hingað fljúga. Ekki síst um nætur, þegar afsláttur er veittur af þjónustunni.
Afraksturinn er sá að landið er ofsetið, það er á sumum svæðum og sumum tímum. Ríkisstjórn Íslands er ráðþrota. Eina sem henni hefur komið til hugar er að hækka verð á þjónustu á ferðafólk, og okkur líka. Fjármálaráðherrann segir að þá muni kannski draga úr flugi til Íslands og að færri ferðamenn muni koma.
Ritstjóri turisti.is, sagði í Morgunvaktinni, að það þekkist í öðrum löndum að flugvélum sé meinað að lenda eða taka á loft yfir blánóttina. Þannig er hægt að stýra hverjir koma og hversu margir, og nágrannar flugvalla fá að sofa um nætur.
Ísland er hins vegar einsog kjörbúð. Opið allan sólarhringinn og meira að segja þar sem ódýrara er að kaupa inn á nóttinni.
Ef draga á úr komu ferðamanna, eða hefta aukninguna, eru aðrar leiðir færar en að hækka skattana. Það er asnalegt að tengja þetta saman. Ef fjöldi ferðamanna er vandamálið, þá má loka Íslandi yfir blánóttina og sjá hvað gerist.
Svo má hækka skattinn. Það er bara allt annað mál og einkennilegt að reyna að fæla fólk frá okkur með rökum ríkisstjórnarinnar. Láta það sjokkerast eftir að það kemur. Byrjum á réttum enda.
Lærum af öðrum þjóðum. Það þarf ekki að vera opið alltaf. Það er hægt að stýra komu ferðafólks. Við ráðum hvort landið er opið allan sólarhringinn, alltaf.
Sigurjón M. Egilsson.
