Sumum þótti jafnvel fyndið þegar forseti lands, sem ég man ekki hvað heitir en má kallast Langtíburtuistan svaraði ásökunum um ömurlega framkomu við samkynhneigt fólk, á þann veg að það væri hin mesta þvæla. Í hans landi væru engir samkynhneigðir. Flóknara var það ekki.
Nú er Ísland komið í sama flokk og Langtíburtuistan. Ekki vegna samkynhneigðra. Nei, vegna mansals. Meðan aðrar þjóðir herða á rannsóknum og gera hvað þau geta til að rannsaka þannig glæpi slökum við bara á, höllum okkur aftur í stólunum, setjum fæturna upp á borð og segjum, mansal, á Íslandi? Kanntu annan.
Reyndar ætla nokkrir Íslendingar að ræða þessi mál um miðjan september. Ekkert virðist liggja á.
Útlendingum er reyndar brugðið. Finnst við standa okkur einstaklega illa. Við höfum verið sett í annan flokk hvað þetta varðar. En hvað vita þessir útlendingar svosem? Er ekki rétt að senda þá í endurmenntun? Frekar en við girðum okkur í brók.
Sigurjón M. Egilsson.
