Inga sakar Helgu Völu um lýðskrum
„Svo er verið að tala um popúlista! Ef þetta er ekki lýðskrum þá veit ég ekki hvað?“
„…það sem vakti ekki síður furðu mína voru Píratar sem ákváðu að láta ekki sjá sig þar sem þeir virtust fatta það tæpum tveimur mánuðum á eftir öllum öðrum hver var heiðursgetur þingfundarins við Öxará,“ eru óbreytt orð Ingu Sæland, formanns Flokks fólksins, um uppákomurnar vegna „hátíðarinnar“ á Þingvöllum í gær.
Inga var meðal ræðumanna í gær og sagði þá meðal annars. „Ég er svo þakklát fyrir að við skulum vera hér saman í dag. Ég er svo þakklát fyrir þá gesti sem hafa heimsótt okkur, sem sýna okkur þá virðingu að taka þátt í þessum merka degi, 100 ára fullveldi Íslands.“
Sem allir vita voru ekki allir jafn ánægðir með gestina. Helga Vala Helgadóttir, þingmaður Samfylkingarinnar, yfirgaf þingpallinn þegar aðalgesturinn Pia Kjærsgaard hélt ræðu.
Inga segir um Helgu Völu: „Ekki síður furðar það mig, að sá einstaklingur sem taldi sig knúinn til að yfirgefa hátíðarþingfundinn í gær, er sá hinn sami sem gat látið sjá sig með maka sínum í hátíarkvöldverði á Hötel Sögu skömmu síðar, en þar hélt forseti danska þingsins einnig góða og ekki síður skemmtilega ræðu. Ræðu sem fékk Helgu Völu ekki til að yfirgefa samkvæmið í mótmælaskini. Hver sem ástæðan kann að vera þá vekur þetta furðu mína, getur ástæðan hugsanlega verið sú að þarna var ekki RÚV með beina útsendingu til að viðkomandi gæti fengið almennilega athygli ? Ég biðst forláts en þetta finnst mér hrein og klár hræsni, viðkomandi hefði ekki átt að láta sjá sig á Hótel Sögu ef hún vildi láta taka mark á sér yfir höfuð. Svo er verið að tala um popúlista! Ef þetta er ekki lýðskrum þá veit ég ekki hvað?“
