Sjálfstæðismenn, margir að minnsta kosti, bera kala til Björns Leví Gunnarsson, þingmanns Pírata. Einn sá harðasti í baráttunni gegn Birni Leví er Davíð Oddsson. Hann er samt fjarri að vera einn í baráttunni gegn þingmanninum.
En hvers vegna? Jú, vegna þess að Björn Leví hefur verið einstaklega duglegur við að spyrja spurninga, veita aðhald, öðru nafni. Það fer fyrir brjóstið á mörgum. Einkum þeim sem hafa eitthvað að fela.
Björn Leví er heiðraður í dag með Staksteinum Moggans.
„Björn Leví Gunnarsson fagnaði því á Alþingi í gær að búið væri að birta upplýsingar um laun og starfskostnað þingmanna frá árinu 2007. Hann telur þetta þó ekki nóg og vill frekari sundurliðanir á kostnaðinum, enda er Birni Leví annt um skattfé almennings eins og alkunna er.“
Þetta er meira en sumir geta þolað. Vitandi að ekkert væri vitað um aksturspeninga einstakra þingmanna ef Björn Leví væri ekki á þingi. Nú hefur hann eflaust fundið tilefni til að uppfræða okkur enn frekar. Þá skal hann tekinn fyrir.
„En það leynist víðar kostnaður en í launum og starfskostnaði þingmanna. Björn Leví Gunnarsson, svo tekið sé dæmi af handahófi, bar til að mynda fram 93 fyrirspurnir á síðasta þingi og hafði þar með yfirburði í keppninni um fyrirspurnarkóng þingsins,“ segir í Staksteinunum.
Og svo er reynt að safna liði gegn Birni Leví með þessum rökum:
„Samkvæmt upplýsingum frá fjármálaráðuneytinu fara almennt 10-40 klukkustundir í að svara hverri fyrirspurn. Ef meðaltalið er þá 25 klukkustundir má ætla að stjórnarráðið í heild hafi eytt um 2.300 klukkustundum í að svara fyrirspurnum Björns Levís á liðnu þingi. Sé þetta rétt mat er líklega ekki fjarri lagi að fyrirspurnir Björns Levís á síðasta þingi hafi kostað skattgreiðendur um 10 milljónir króna.“
Staksteinar neyðast til að mæra Björn Leví, nema skrifin séu sett fram í hálfkæringi, þá misheppnuðum.
„En þá ber að líta til þess að allt voru þetta afar vel ígrundaðar og áríðandi fyrirspurnir, ekki síður en þær þrettán sem sami þingmaður bar fram í fyrradag. Sennilega mun ekki kosta nema milljón til eina og hálfa að svara þeim. Það er vel sloppið.“
Enginn þingmaður sinnir aðhaldsskyldu sinni eins vel og Björn Leví. Andúðin sem hann verður fyrir er merki um að hann er á réttri leið.