Og Katrín Jakobsdóttir samþykkir þetta. Hún virðist bæði viljalaus og valdalaus í þessari ríkisstjórn.
Katrín Baldursdóttir skrifar:
Ég varð svo hvumsa við að hlusta á Kristján Þór sjávarútvegsráðherra í fréttum RUV að ég var lengi að ná mér. Hann sagðist ætla að meta það sjálfur í hvert sinn hvort hann væri hæfur þegar upp koma mál sem snerta Samherja. Það er sem sagt alveg undir honum sjálfum komið. Hann getur ráðið því sjálfur hvort og hvenær hann segir sig frá Samherjamálum sem sjávarútvegsráðherra.
Þó að það séu að koma jól þá verð ég að segja að ég þoli þetta ekki. Fæ hressilegan hroll um allan líkamann. Hversu lágt er hægt að komast í íslenskum stjórnmálum? Það sjá það flestir hvað þetta er galið. Nema ríkisstjórnin. Og Katrín Jakobsdóttir samþykkir þetta. Hún virðist bæði viljalaus og valdalaus í þessari ríkisstjórn. Nema henni finnist þetta í alvöru allt í lagi sem er mjög alvarlegt. Meira að segja Eiríkur Bergmann stjórnmálafræðingur segir það augljósa að Kristján Þór er ekki hæfur í embættið. Ég held að almenningur þurfi að taka sig til eftir áramót og mótmæla hressilega þessu, spillingunni og misréttinu í samfélaginu.
