Sigurjón Þórðarson:
Það þarf vart að taka það fram að það voru handbendi stórútgerðarinnar sem skrifuðu skýrslu Svandísar og Auðlindarinnar „okkar“ en þar var auðvitað boðað að festa óskapnaðinn í sessi. Hvað er að þessu fólki – hefur ríkisstjórnin enga sómakennd?
Ríkisstjórn Katrínar Jakobsdóttur er stórundarleg, en fyrir hver jól stendur það venjulega illilega í ríkisstjórninni að fleyta áfram tillögu Flokks fólksins um að tekjulágir öryrkjar og aldraðir fái jólaábót ofan á lágar bætur.
Á sama tíma þykir stjórnarmeirihlutanum eðlilegt og sanngjarnt að veita bílaleigunum styrki upp á milljarð króna og helstu kvótaþegum landsins, á borð Ísfélagið og Samherja hundruð milljón kr. styrki árlega, úr Orkusjóði. Færri vita af því að Síldarvinnsla Samherja, sem hefur sett atvinnulíf á Seyðisfirði í uppnám nú í haust, fær árlega myndarlega byggðastyrki í formi byggðakvóta. T.d. fær fyrirtækið megnið af byggðakvóta Þingeyrar eða vel á fjórða hundrað tonn, af árlegum 500 tonna byggðakvóta sem úhlutað er til Þingeyrar.
Síldarvinnslan landar ekki einum sporði í plássið, en í tengslum við samning um úthlutunina á Þingeyri er að vísu ákvæði um að óræður fjöldi starfsmanna á Þingeyri sé í einhverri vinnslu aukaafurða. Ég hef sem varamaður í stjórn Byggðastofnunar óskað eftir að fá nánari upplýsingar um vinnsluna m.a. grunnupplýsingar um fjölda starfsmanna, en það er mjög djúpt á þeim. Flest bendir til þess að hagsmunir þorpsins fyrir vestan hafi ekki verið aðalatriðið við úthlutun aflaheimildanna heldur hafi önnur sjónarmið ráðið för.
Hvað sem því líður, þá er það niðurstaða 125 milljón króna nefndarstarfs Svandísar Svavarsdóttur þ.e. Auðlindarinnar „okkar“ að sérstaki byggðakvótaúthlutun Byggðastofnunar væri ákaflega vel heppnuð aðgerð! Það þarf vart að taka það fram að það voru handbendi stórútgerðarinnar sem skrifuðu skýrslu Svandísar og Auðlindarinnar „okkar“ en þar var auðvitað boðað að festa óskapnaðinn í sessi. Hvað er að þessu fólki – hefur ríkisstjórnin enga sómakennd?